Mvutano mkubwa waibuka kaskazini mwa Kosovo baada ya mashambulizi dhidi ya polisi
Majibizano ya risasi yalifanyika na polisi siku ya Jumamosi baada ya mamia ya Waserbia kuweka vizuizi kwenye barabara kaskazini mwa nchi, kuzuia shughuli mbalimbali katika sehemu mbili za vivuko kati ya Kosovo na Serbia. Belgrade itarasimisha siku ya Jumatatu au Jumanne barua la kuomba Jumuiya ya Kujihami ya Nchi za Magharibi, NATO, kupeleka vikosi vya usalama huko Kosovo.
Imechapishwa:
Mvutano ulikuwa mkubwa Jumapili Desemba 11 kaskazini mwa Kosovo baada ya watu wenye silaha wasiojulikana kurushiana risasi na polisi usiku kucha kuanzia Jumamosi hadi Jumapili. Makumi ya Waserbia walikusanyika tena asubuhi kwenye vizuizi vilivyowekwa siku iliyopita na ambavyo vimezorotesha shughuli mbalimbali katika vivuko viwili vya mpaka kati ya Kosovo na Serbia. Waserbia hawa wa Kosovo wanapinga kukamatwa kwa afisa wa zamani wa polisi ambaye alijiuzulu mnamo mwezi wa Novemba pamoja na wawakilishi wengine wa Waserbia walio wachache kupinga uamuzi wa Pristina wa kupiga marufuku nambari za usajili wa magari za Serbia.
Maafisa wa polisi ya Umoja wa Ulaya waliotumwa katika eneo hilo kama sehemu ya ujumbe wa EULEX wamesema pia walilengwa na bomu la kutupwa, ambalo halikusababisha majeraha yoyote katika safu yao.
Mvutano umeongezeka kabla ya uchaguzi wa serikali za mitaa katika manispaa zenye wakazi wengi kutoka jamii ya Waserbia ambao awali ulipangwa kufanyika Desemba 18, ambao chama kikuu cha Serbia kinataka kuususia. Milipuko na milio ya risasi ilisikika mwanzoni mwa wiki, huku mamlaka za ndani zikijaribu kujiandaa kwa uchaguzi huo. Afisa wa polisi kutoka jamii ya Albania, sehemu ya vikosi vilivyotumwa katika eneo hilo, amejeruhiwa.
Belgrade inataka kukata rufaa kwa NATO
Rais wa Serbia Aleksandar Vucic ameashiria nia yake ya kuomba kibali cha kupeleka vikosi vya usalama. Kwa mara ya kwanza kwa Belgrade tangu kumalizika kwa vita huko Kosovo mnamo 1999 na kutangazwa kwa uhuru wa jimbo la zamani la Serbia. "Tumekubali kumwomba kamanda wa Kfor ruhusa ya kupeleka vikosi vya jeshi na polisi vya Jamhuri ya Serbia kwenye eneo la Kosovo, kwa mujibu wa azimio la Baraza la Usalama," amesema. Lakini hatuna matumaini kwamba watakubali ombi letu. "
Waziri Mkuu wa Kosovo Albin Kurti kwa upande wake ameishutumu Serbia kwa "kutishia Kosovo kwa uchokozi".
Uchaguzi wa serikali za mitaa kuahirishwa
Ili kutuliza mvutano, Rais wa Kosovo, Vjosa Osmani alitangaza kwa upande wake kuahirishwa kwa uchaguzi wa mapema wa mitaa uliopangwa kufanyika Desemba 18 katika manispaa nne zenye Waserbia wengi. Uchaguzi ambao vyama vya kisiasa vya Serbia vinapanga kususia. "Kulingana na tathmini, ikiwa ni pamoja na ripoti ya taasisi za usalama, nilipendekeza kuahirishwa kwa uchaguzi wa mitaa katika mitaa minne," amesema. Kwa kumalizia, tumepanga tarehe ya uchaguzi huu ya Aprili 2023.
Balozi za Ufaransa, Ujerumani, Italia, Uingereza na Marekani, pamoja na uwakilishi wa Umoja wa Ulaya, zimekaribisha kuahirishwa kwa uchaguzi huo, kwa kuona ni "uamuzi wa kujenga" wa "kuendeleza juhudi za kufikia hali salama zaidi katika kaskazini".
Waserbia wachache wa Kosovo, ambao wanafikia takriban 120,000 kati ya jumla ya wakazi wa Kosovo wapatao milioni 1.8, wamekataa kujitangazia uhuru wa Kosovo tangu 2008 na uaminifu wao kwa Pristina, kwa kutiwa moyo na Belgrade.
(Pamoja na AFP)