Burkina Faso: HRW yalishushia lawama jeshi kwa mauaji ya raia 223
Shirika la kutetea haki za binadamu la Human Rights Watch limeshutumu katika ripoti kwamba vikosi vya jeshi la Burkina Faso, vikipambana na makundi ya wanajihadi wenye silaha, "viliwaua raia wasiopungua 223" wakiwemo watoto wasiopungua 56 wakati wa mashambulizi mawili kaskazini mwa nchi hiyo. Mamlaka ya Burkina Faso haijazungumza chochote kuhusiana na ripoti hii.
Imechapishwa:
"Jeshi la Burkina Faso kwa jumla liliwaua takriban raia 223, wakiwemo angalau watoto 56, katika vijiji viwili mnamo Februari 25, 2024," inasema ripoti ya Human Rights Watch. "Askari waliwaua watu 44, wakiwemo watoto 20, katika kijiji cha Nondin na watu 179, wakiwemo watoto 36, katika kijiji jirani cha Soro," kilichopo katika wilaya ya Thiou, kaskazinimwa Burkina Faso, kulingana na HRW.
Waandishi wa uchunguzi huo wanasema waliwahoji watu 23 kwa njia ya simu, wakiwemo mashahidi 14 wa mauaji hayo, na video na picha zilizothibitishwa zilizoshirikiwa na manusura. "Mauaji haya ya umati, miongoni mwa dhuluma mbaya zaidi za jeshi nchini Burkina Faso tangu mwaka 2015, yanaonekana kuwa sehemu ya kampeni ya kijeshi iliyoenea dhidi ya raia wanaoshutumiwa kushirikiana na makundi ya wanamgambo wa Kiislamu yenye silaha, na yanaweza kuwa uhalifu dhidi ya binadamu," imesema HRW.
Utawala wa Kapteni Ibrahim Traoré, aliyeingia madarakani kupitia mapinduzi ya kijeshi mwaka 2022, umepitisha mkakati wa kupambana dhidi ya makundi ya wanajihadi ambayo yanadhibiti maeneo makubwa ya ardhi ya Burkina Faso, kwa gharama ya hasara nyingi za raia kulingana na mashirika yasiyo ya serikali na watetezi wa haki za binadamu.
Mauaji katika vijiji vya Nondin na Soro "ni mauaji ya hivi punde zaidi ya raia yanayofanywa na jeshi la Burkina Faso kama sehemu ya operesheni zake za kukabiliana na waasi," amesema Tirana Hassan, mkurugenzi mtendaji wa HRW aliyetajwa katika ripoti hii. "Kushindwa mara kwa mara kwa mamlaka ya Burkina Faso kuzuia na kuchunguza ukatili kama huo kunaonyesha kwa nini usaidizi wa kimataifa ni muhimu kusaidia uchunguzi wa kuaminika kuhusu uhalifu dhidi ya binadamu," ameongeza.
Mnamo tarehe 25 Februari, televisheni ya taifa ya Burkina Faso iliripoti kwamba wanajeshi kutoka Kikosi cha Rapid Intervention Battalion (BIR), kitengo cha wasomi, waliwafuata wapiganaji waliokuwa wakikimbia kuelekea kijiji cha Thiou kufuatia shambulio la wanajihadi kwenye kambi ya kijeshi, na "kuwazuia watu wengi iwezekanavyo, wale ambao hawakuweza" kukimbia, bila kutaja waathiriwa wa kiraia. Mnamo Januari, HRW ilishutumu jeshi la Burkina Faso kwa kuwaua takriban raia 60 katika mashambulizi ya ndege zisizo na rubani yaliyowasilishwa na serikali kuwa yalilenga wapiganaji wa kijihadi.